أنا مش منبوذ// كلمات : أحمد عبدالرازق أبو العلا

المشرف العام الخميس نوفمبر 08, 2007 10:48 am

أنا مش منبوذ

أنا مش مكروه
ولا منبوذ
بس أقدر أشوف من خرم الكوز
ولأني بشوف أكتر م اللازم
ما لقيش في وشوشهم، غير لوي البوز
ويقولوا عليا أن أنا متشائم
وأهبل ، وعبيط !!
وبخش براسي في صدر الحيط !!
أضحك وأرضيهم
وأمط الشفة
وأقول : يمكن .. يجوز
لو تلعب وتماين وياهم
يمكن يدوك حبة لوز وشوية جوز
لكن لازم تعرف ..
.. انك مش ممكن تبقي أكتر من حتة أراجوز
تلعب .. تتشعبط .... تتلون ..
تتنطط تتزحلق - في الآخر - علي قشرة موز
وساعتها مش ممكن هيمدوا ايديهم
لان ايديهم متعاصة : فلوس ونفوذ ..

كلمات: أحمد عبد الرازق أبو العلا
http://wwwaboelela.blogspot.com/
http://www.ahmedaboelela.tk