غيبوبة// ;كلمات : حسين راشد

المشرف العام السبت نوفمبر 10, 2007 9:22 pm

غيبوبة
كلمات : حسين راشد
حصان وصهللة دبابة
وعيون مترصعة بديابة
ووشوش تشوفها
تحدفك للغابة
وايدين بتنحت على الطريق
سكة سلامة
وآه ..
بتطلع من جوف الشهيد
تناديك
خليك!!!!!!
لكن هتقوم القيامة!
مستني ايه.. وليه؟

بتاخد الروح البريئة لسكة الأوحال
تقدم النية على طبق
أوحال
و بوسة عنقودية
تلف الزمن قدام
وعشان ما تتلفع
بشالك المركون
لازملك يا ولدي
مليون بروتوكول
وتساوم على البنطلون
تقلع عيونك على الطريق
تلبس مكانهم
هطل
تدفع الباب اليمين
وتشد السطح على بلاطك
ايه اللي نابك
ما كنت مرتاح
ومش فاهم!!!
ايه اللي خلى الحمار
نهق .. وسمعني؟
ايه اللي خلا الديب
عوا
ونبهني؟
ما كنت ملفوف بحكمة الغفلة!!!
وان حكمت القافية
كنت بتوه
يلعن ابوه

هو اللي فوقني